«Այբ» հիմնադրամի ԲՈՒՄ մրցաշարը՝ PMI Science-ի աջակցությամբ․ երիտասարդ գիտնականներին ոգևորել է պետք (տեսանյութ)

Հայաստանը ունի հարուստ գիտական ժառանգություն։ Հայ գիտնականները՝ թե՛ Հայաստանում, թե՛ Հայաստանից դուրս, բազմիցս ապացուցել են, որ ստեղծարար հայ միտքը կարող է լուծել բազմաթիվ գործնական խնդիրներ ու առաջ մղել գիտության զարգացումը։ Իսկ ի՞նչ է պետք, որպեսզի էլ ավելի շատ խոսվի ոչ թե հարուստ գիտական ժառանգության ու ներուժի, այլ գիտության ոլորտում Հայաստանի ու հայ գիտնականների նորանոր նվաճումների մասին։ Պատասխանն ակնհայտ է․ օգնել երիտասարդ լուսավոր ուղեղներին, որ հասկանան ու գնահատեն գիտության ներուժն ու հավատան, որ գիտությունը Հայաստանում արդի է և գնահատված։

Թերևս, հենց այս նպատակով Ֆիլիպ Մորրիսի PMI Science գիտահետազոտական կենտրոնում վերջերս տեղի ունեցավ «Այբ» կրթական հիմնադրամի կողմից կազմակերպված բնագիտության ուսանողական առաջին՝ ԲՈՒՄ մրցաշարը։ ԲՈւՄ-ը բնական գիտություններ (կենսաբանություն, ֆիզիկաև քիմիա) ուսումնասիրող ուսանողների մրցաշար է, որում ուսանողները, ստեղծելով թիմեր, մրցում են իրենց գիտելիքներով։ Միջոցառումը մեկ ընդհանուր հարթակ է բնական գիտություններով զբաղվող ուսանողների ու մասնագետների համար՝ խնդիրների բազմակողմանի և միջառարկայական լուծումներ գտնելու համար։

«Այբ» կրթական հիմնադրամը, որ տարիներ շարունակ իր կայուն ներդրումն է ունենում Հայաստանում գիտության զարգացման մեջ, արդեն իսկ ստեղծել է նախադրյալներ նմանատիպ միջոցառումների նկատմամբ երիտասարդների հետաքրքրվածությունը մեծացնելու համար։ 2010-ից հիմնադրամն անցկացնում է Պատանի քիմիկոսների մրցաշար։ 2020-ից այս մրցաշարի շարունակությունը դարձել է Ուսանողական մրցաշարը։ Մրցաշարի մասնակիցները նաև հաջողությամբ մասնակցել են միջազգային մրցույթին: Այս տարի հիմնադրամը մեկնարկել է առաջին Քեմոինֆորմատիայի բութքեմփը՝ FAST հիմնադրամի հետ համատեղ, որի շրջանակում նաև լավագույն արդյունք արձանագրած թիմերը ստացել են արտոնություններ։

«Այբ» կրթական հիմնադրամն իր բազմաթիվ նախագծերի միջոցով իր ուշադրության կենտրոնում է պահում բնագիտամաթեմատիկական ոլորտը։ Երիտասարդները մշտապես կարիք ունեն վերաարժեվորելու գիտությունը, դրա հնարավորությունները և այն մեծ ներուժը, որը ոլորտն իր մեջ ունի։ Կարևորը, որպեսզի երիտասարդները դա տեսնեն, հասկանան ու ոգևորվեն դրանով», – շեշտում է «Այբ» կրթական հիմնադրամի գործադիր տնօրեն Սոնա Կոշեցյանը։

ԲՈՒՄ-ի նման մրցաշարերը խիստ կարևոր են, քանի որ դրանց շնորհիվ ընդլայնվում է գիտական համայնքը, ապահովվում է բնագիտական առարկաներով հետաքրքրված անհատների միջև կապը, ստեղծվում են ուսանողական գիտական խմբեր, կիրառվում է գիտական ուսուցման մեթոդաբանություն, ինչպես նաև ապահովվում է գիտական ու տեխնոլոգիական հաստատությունների և գիտական խմբերի միջև կապը։

Հենց սա է պատճառը, որ ԲՈՒՄ մրցաշարի գլխավոր գործընկերն այս տարի դարձավ Ֆիլիպ Մորրիսի PMI Science գիտահետազոտական կենտրոնը։ Արդեն մոտ 5 տարի է, ինչ կենտրոնը գործում է Հայաստանում՝ հետազոտական ինստիտուտների ու հայ գիտնականների հետ իրականացնելով համատեղ ծրագրեր և աջակցելով Հայաստանում գիտության զարգացմանը։ Մագիստրոսական ու ասպիրանտական կրթաթոշակներ, գիտական խմբերի աշխատանքների ֆինանսավորում, մասնագիտական միջոցառումներ ու համաժողովներ․ PMI Science-ի գործիքակազմն այսքանով չի սահմանափակվում։

Կենտրոնի ղեկավար Վահե Դանիելյանը մեկնաբանում է․ «Հայաստանը ունի հարուստ գիտական ժառանգություն ու տեխնոլոգիական ներուժ։ Դրանով է բացատրվում Ֆիլիպ Մորրիսի PMI Science գիտահետազոտական կենտրոնի աջակցությունը նմանատիպ գիտական ծրագրերին ու կրթական նախաձեռնություններին։ Բացի այդ, հավատացած լինելով, որ մեր երկրի մրցակցային առավելությունը գիտելիքահեն տնտեսության կառուցումն է, մենք նաև , ինչպես նաև մեր երկրի գիտական զարգացման համար կարևորագույն ոլորտներում մեր իսկ նորարարական ծրագրերի իրականացումը»:

ԲՈՒՄ մրցաշարի ժյուրիի նախագահող Սուսաննա Կոտիկյանը համոզված է՝ մեկ մասնագիտության մեջ մասնագիտանալով լավ մասնագետ չես դառնա, մանավանդ բնագիտական ոլորտում։ «Բժիշկը չի կարող լինել լավը, եթե չգիտի լավ կենսաբանություն, քիմիա, ֆիզիկա, և դա վերաբերվում է բոլորին։ Ինձ թվում է՝ կամաց-կամաց հասնում ենք մեր նպատակին»։

Ինչպես իրենք են ասում՝ շատ տպավորված ու մոտիվացված, մրցաշարի մասնակիցները կիսվում են իրենց տպավորություններով։ Շեշտում են՝ թեև յուրաքանչյուր թիմ անհատական մոտեցում է պահանջում, ամենալավ արդյունքը ստացվեց ոչ թե ամենաթեժ պայքարում, այլ ամենակառուցողական պայքարում։

Հուսանք, որ նման միջոցառումները կտան ցանկալի արդյունքն ու լավագույն տաղանդները իրենց ապագան կկապեն գիտության հետ՝ պատվով ներկայացնելով Հայաստանը միջազգային գիտական թատերաբեմում։