Շիրակի մարզի դատախազությունն ուսումնասիրում է Գյումրու ավագանու որոշման հավելվածը

Գյումրի համայնքի ավագանու 2019 թվականի նոյեմբերի 12-ի  N 173-Ա որոշմամբ  թույլատրվել էր Գյումրի համայնքի հաշվեկշռում առկա որոշ անշարժ գույքերի դուրսգրումը` «Կրկնվող շենք-շինություն, «Հանձնված է մարզպետարանին», «Օտարված շենքեր», «Չհայտնաբերված շենք-շինություն» վերնագրերով:

Որոշումն ընդունվել էր ներկա ավագանու անդամների 18 կողմ, 2 դեմ եւ 7 ձեռնպահ քվեարկության արդյունքում:

Գյումրի համայնքի ավագանին նման որոշում էր կայացրել` ղեկավարվելով «Տեղական ինքնակառավարման մասին» Հայաստանի Հանրապետության օրենքի 18-րդ հոդվածի 1-ին մասի 42-րդ կետով, Հայաստանի Հանրապետության ֆինանսների և էկոնոմիկայի նախարարի 2007 թվականի հոկտեմբերի 31-ի 787-Ն որոշման 1-ին կետով հաստատված կարգի 13-րդ կետով և հիմք ընդունելով Գյումրի համայնքի ղեկավարի 2017 թվականի նոյեմբերի 01-ի 28-Ա կարգադրությամբ ստեղծված հանձնաժողովների եզրակացությունները և արձանագրությունները:

ՀՀ քաղաքացի Լեւոն Բարսեղյանը 2019 թվականի նոյեմբերի 15-ին դիմել էր ՀՀ գլխավոր դատախազ Արթուր Դավթյանին` տեղեկացնելով, որ Գյումրու ավագանու 2019 թվականի նոյեմբերի 12-ի նիստում քննարկման է դրվել համայնքային սեփականություն հանդիսացող մի քանի խումբ անշարժ գույք դուրսգրելու մասին հարցը: Այդ խմբերից են` «Օտարված շենքեր»-ը՝ 13 անուն, հաշվեկշռային արժեքը՝ 3.784.294 դրամ եւ «Չհայտնաբերված շենք-շինություններ»-ը՝ 21 անուն, հաշվեկշռային արժեքը՝ 81.918.427 դրամ: «Նիստում, պատասխանելով իմ հարցերին համայնքապետարանի պաշտոնյաները տեղեկացրել են, որ այդ շենք-շինությունների օտարման կամ վերացման մասին որեւէ փաստաթուղթ համայնքապետարանը չի տնօրինում, չունի, ուղղակի պարզել է, որ այդ շենքերը թեպետ համայնքային գույքացուցակում եղել են երկար ժամանակ, հիմա իրականում կամ համայնքապատկան չեն կամ գոյություն չունեն: Խնդրել էի քննության առնել այդ խնդիրը, հանձնարարել՝ ուսումնասիրել Գյումրի համայնքին հասցված հնարավոր վնասը, եւ հիմքերի դեպքում քրեական գործ հարուցել»,-դատախազին տեղեկացրել էր Լ.Բարսեղյանը:

Դատախազին դիմելուց հետո Լ.Բարսեղյանը, տեսնելով, որ որեւէ հրապարակային տեղեկություն չկա այդ քննության մասին եւ իրեն էլ որեւէ տեղեկություն չի հաղորդվել քննության մասին, ստիպված նորից` 2022 թվականի ապրիլի մեկին, դիմել է գլխավոր դատախազ Արթուր Դավթյանին` խնդրելով քննության առնել այդ հաղորդումը եւ այդ նիստում հնչած հայտարարությունները, թե Գյումրու համայնքապատկան 21 անուն գույք է անհետացել (ցանկը կցել է դիմումին), եւ խնդրել է  տեղեկացնել իրեն քննության ընթացքի մասին:

2022 թվականի ապրիլի 15-ին Լ. Բարսեղյանի դիմումին պատասխանել է Շիրակի մարզի դատախազության ավագ դատախազ, արդարադատության 2-րդ դասի խորհրդական Ա.Տ.Մնոյանը` տեղեկացնելով, որ Լ.Բարսեղյանի 15.11.2019 թվականի ներկայացրած դիմումով տրամադրված տեղեկությունների հիման վրա «Դատախազության մասին» ՀՀ օրենքի 29-րդ հոդվածով սահմանված կարգով Շիրակի մարզի դատախազությունում պետական շահերի պաշտպանության հայց հարուցելու լիազորությունների շրջանակում կատարվում է ուսումնասիրություն, որը դեռեւս գտնվում է ընթացքի մեջ:

«Ուսումնասիրության արդյունքում տեղեկություններ են ձեռք բերվել, որ Չհայտնաբերված շենք-շինություններ» վերնագիրը կրող ցանկով ներկայացված 21 անուն գույքերից 00003, 00004, 00106, 00107, 00234, 00285, 00294, 00326, 00330, 00331, 00332, 00333, 00334 համարների տակ հաշվառված շենք-շինությունները (ընդհանուր 13 գույք) գոյություն չունեն, դրանց` համայնքապետարանի հաշվեկշտում հաշվառելու պահին փաստացի գոյություն ունենալու վերաբերյալ տվյալներ ձեռք չեն բերվել, նախկինում դրանց գտնվելու վայրերի (հասցեների) վերաբերյալ տեղեկություններ ձեռք չեն բերվել, բացի այդ, ձեռք չեն բերվել տեղեկություններ առ այն, որ հիշյալ գույքերի ներկա պահին գոյություն չունենալու հանգամանքը կապված է մարդկային գործոնի հետ եւ որեւէ ենթադրյալ հանցանքի (հանցանքների) արդյունք է:

Ուսումնասիրությամբ պարզվել է նաեւ, որ «Չհայտնաբերված շենք-շինություններ» վերնագիրը կրող ցանկով ներկայացված 21 անուն գույքերից թվով 6 գույքեր ներկա պահին գոյություն ունեն, դրանցիից մեկը պատկանում է համայնքապետարանին (00325 համարի տակ հաշվառված գույքը), իսկ թվով 5 գույքեր օտարված են: Բացի այդ պարզվել է, որ 00017 համարի տակ հաշվառված գույքը քանդվել է եւ նույն վայրում կառուցվել է «Անի» փողային նվագախմբի շենքը (ք.Գյումրի, Ավ.Իսահակյան փ., 97/9), որը պատկանում է համայնքապետարանին:

«Փաստաթուղթ չունեցող` օտարված շենք-շինություններ» վերնագիրը կրող ցանկով ներկայացված 14 անուն գույքերից 9 գույքերը օտարված են, 2-ը պատկանում են համյքնապետարանին, 00301, 00302, 00303 համարների տակ հաշվառված գույքերը քանդված են եւ գոյություն չունեն, բացի այդ, ձեռք չեն բերվել տեղեկություններ առ այն, որ հիշյալ երեք գույքերի քանդված լինելու հանգամանքը կապված է մարդկային գործոնի հետ եւ որեւէ ենթադրյալ հանցանքի (հանցանքների) արդյունք է»,-գրավոր տեղեկացրել է Շիրակի մարզի ավագ դատախազ Ա.Տ.Մնոյանը, ավելացնելով, որ վերոգրյալից զատ, կատարված ուսումնասիրության շրջանակներում ձեռք են բերվել տեղեկություններ երկու գույքի օտարման գործընթացում թույլ տրված առերեւույթ չարաշահումների մասին, որի հիմքով ձեռնարկվել են քրեադատավարական միջոցներ եւ հարուցվել են քրեական գործեր, որոնք միացվել են ՀՀ քննչական կոմիտեի Շիրակի մարզային քննչական վարչությունում քննվող 58236019 քրեական գործին եւ ուսւոմնասիրության ընթացքում պարզված այդ ենթադրյալ հանցավոր արարքները, ի թիվս այլնի, ընդգրկված են նախկինում Գյումրու քաղաքապետի պաշտոնը զբաղեցրած անձին առաջադրված մեղադրանքում:

Դատախազությունը նաեւ տեղեկացրել է, որ ուսումնասիրությունը «Չհայտնաբերված շենք-շինություններ» վերնագիրը կրող ցանկով եւ «Փաստաթուղթ չունեցող` օտարված շենք-շինություններ» վերնագիրը կրող ցանկով գույքերի վերաբերյալ դեռեւս շարունակվում է:

Ուսումնասիրության ընթացքի եւ վերջնական արդյունքների մասին լրացուցիչ տեղեկացնելու են:

Անի Մկրտչյան