Yerevan Tech Forum 2022-ի շրջանակներում Tert.am-ը զրուցել է «ՆՈՐՔ» սոցիալական ծառայությունների տեխնոլոգիական և իրազեկման կենտրոն հիմնադրամի գործադիր տնօրեն Անահիտ Պարզյանի հետ։
Խոսելով այն մասին, թե ժամանակակից աշխարհում ի՞նչ մարտահրավերներ է առաջացնում թվային տեխնոլոգիաների արագ տարածումը, Անահիտ Պարզյանը նշեց․«21-րդ դարում համացանցը ամենամեծ արժեքավոր ձեռքբերումն է, որ մարդկությունը ստեղծել է։ Մեզանից յուրաքանչյուրը մեծ կախվածություն ունի տեխնոլոգիական տարբեր գործիքներից, մեր ամենօրյա կյանքը ամբողջապես տեղափոխվել է օնլայն տիրույթ, սա բնականաբար ունի և՛ առավելություններ, և՛ դժվարություններ։ Պետությունը պետք է առաջարկի այնպիսի հանրային ծառայություններ, որոնք թվային տիրույթում նույնպիսի գրավչություն կունենան, որքան մասնավոր հատվածում։ Ուստի մարտահրավերները բազմազան են, պետք է կարողանանք ճիշտ գնահատել դրանք, որպեսզի մարդկության այս կարևոր ձեռքբերումը միայն արժեքավոր լինի, հատկապես մեր երկրի համար»։
Հարցին՝ ի՞նչ պետք է անի Հայաստանը իր ապագան թվային տիրույթի կանոններին համապատասխան կառուցելու համար, Պարզյանը նշեց․ «Երբ թվայնացնում ես ինչ-որ բան, անհրաժեշտություն է առաջանում թվայնացնել նաև ամբողջ էկոհամակարգը, ներառյալ մարդկանց մտածելակերպը։ Թվայնացված գործիքները առոչինչ են, եթե հանրությունը այն չի կիրառում, իսկ որպեսզի կիրառի, պետք է շատ լավ վերլուծենք, թե ով է մեր հասարակությունը, ինչպիսի կարիքներ և գրագիտություն ունի։ Պետք է կարողանանք օգտագործել այն հսկայական տվյալները, որոնք գեներացվում են ամեն օր մեր կատարած աշխատանքով։ Այդ տվյալների հիման վրա պետք է կարողանանք քաղաքացիահեն և քաղաքացիակենտրոն ծառայությունների ձևավորմամբ զբաղվել։ Սա կնպաստի քաղաքացի-պետություն վսահությանը և փոխգործակցությանը»։
Անահիտ Պարզյանը նշեց, որ սոցիալական ոլորտում առաջին անգամ փորձում են կիրառել արհեստական բանականությունը՝ սոցիալական կարիքները գնահատելու համար։
«Սա նշանակում է, որ այս վերլուծությունը ավելի թիրախային տվյալներ է տրամադրում սոցաշխատողներին՝ ճշգրիտ ուսումնասիրություններ անելու և առկա կարիքները գնահատելու համար։ Այն էապես տարբերվում է սոցիալական, ոլորտային ուսումնասիրություններից, որովհետև համակարգը հնարավորություն է տալիս որոշել, թե ինչպիսի՞ կարիքներ կարող են հետագայում առաջանալ։ Ամեն ինչ անում ենք քաղաքացիների համար սոցիալական ոլորտը թվային և հարմարավետ դարձնելու համար, որովհետև սոցիալական ոլորտը այն ոլորտն է, որը մատուցում է ծառայություններ մինչև մարդու ծնունդը և մահից հետո, ուստի ամենաերկար «ճամփորդությունը» փորձում ենք թվային տիրույթում դարձնել հարմարավետ։ Նորարարությունները լինելու են մինչև 2025 թ-ը, բայց կարծում են, որ այն կարևոր փոփոխությունները, որոնք այժմ ներդրվում են, էականորեն փոխելու են քաղաքացիների փորձառությունը սոցիալական ծառայությունների ստացման գործընթացում»,- ասաց «ՆՈՐՔ» սոցիալական ծառայությունների տեխնոլոգիական և իրազեկման կենտրոն հիմնադրամի գործադիր տնօրենը։
7 Новостей изтой же категории
