«Ունենք նոր իրավիճակ, երբ «Դիմադրություն» շարժոըմը վերակազմակերպվում է, գնում է մի ճանապարհով, «Հայրենիք» կուսակցությունը որոշում է կայացրել գնալ այլ ճանապարհով»,-«Հրապարակ»-ին տված հարցազրույցում հայտնեց «Պատիվ ունեմ» խմբակցության ղեկավար, «Հայրենիք» կուսակցության նախագահ Արթուր Վանեցյանը, որը օրեր առաջ հայտարարեց պատգամավորական մանդատից հրաժարվելու մասին։
Նրա խոսքով, իր որոշման մասին ինքը տեղյակ է պահել ՀՀ երրորդ նախագահ, ՀՀԿ նախագահ Սերժ Սարգսյանին։
«Սերժ Սարգսյանն իր կարծիքն է ունեցել, բայց հարգել է իմ որոշումը։ Խոսել եմ նաև ՀՀԿ իիմ գործընկերների, խմբակցության պատգամավորների, «Հայաստան» խմբակցությունում ներգրավված կուսակցությունների ղեկավարների՝ Իշխան Սաղաթելյանի, Վահե Հակոբյանի հետ, խոսել եմ Սեյրան Օհանյանի հետ։ Եղել են տարբեր կարծիքներ, բայց նրանք հարգանքով են մոտեցել իմ որոշմանը»,-ասաց ընդդիմադիր գործիչը։
Անդրադառնալով այն կարծիքներին, թե Վանեցյանը հրաժարականով իշխանության ասեղն է թելնում, թուլացնում է իշխանության դեմ պայքարը, «Հայրենիք» կուսակցության նախագահն ասաց՝ չի կարող և չի ուզում լինել այս իշխանության հետ որևէ առնչություն ունենալ։
«Մենք տարբեր արժեհամակարգերի կրողներ ենք, տարբեր աշխարհընկալումներ ունենք, որևէ կերպ չեմ ուզում այս իշխանության հետ առնչություն ունենալ։ Ինչ վերաբերում է պառակտելուն, նորից եմ կրկնում, նպատակը մեկն է, և յուրաքանչյուրն է ընտրում, թե ինչպես հասնել դրա իրականացմանը»,-ասաց Վանեցյանը՝ ավելացնելով, որ չեն եղել խոր տարաձայնություններ, սակայն եղել են տարբեր կարծիքներ մոտեցումների, գործողությունների հերթականության վերաբերյալ։
Նա ասաց՝ Ազատության հրապարակում շուրջօրյա իրազեկման ակցիայի իրականացման ընթացքում զրուցել է տասնյակ հազարավոր մարդկանց հետ։
«Օրվա մեջ մոտ 20 ժամ զրուցել եմ տարբեր մարդկանց հետ, մարդիկ կարիք ունեն խոսելու, լսելու, լսվելու։ Այն քաղաքական գործիչները, առաջնորդները, որ այսօր կան դաշտում, պետք է լսեն մարդկանց, վերլուծություն, անեն, դրա հիման վրա իրենց հետագա քայլերը որոշվեն։ Ես կարծում եմ, որ քաղաքացիների հետ երկխոսությունը պետք է շարունակվի ու ավելի խորանա։ Առաջին փուլում պետք է խոսենք քաղաքացիների հետ, մեծացնենք թիմը, թե կուսակցական, թե համախոհների, բացատրենք մարդկանց, թե իրականում ինչ է կատարվում երկրում»,-ասաց Վանեցյանը՝ ավելացնելով, որ Նիկոլ Փաշինյանը խաբել ու շարունակում է խաբել հայ հասարակությանը բոլոր հարցերում, իսկ խորհրդարանը չի արտացոլում հանրային տրամադրությունները։
Մանրամասները՝ սկզբնաղբյուր կայքում։
7 Новостей изтой же категории
